हरिश्चंद्रगडा..!!

दूर कडेकपारीतून येते ऐकू

वाऱ्याची एक प्रेमळ साद

हाक देतोय सह्याद्री

लेकरा त्याची मायाच अफाट

पाऊले चालती भेटीकरिता

उमजे मनी वारंवार

हरिश्चंद्रगडा, याचि देही

स्थापत्याचा मूर्तिमंत आविष्कार

भव्य असे त्याचे रूप

रुबाबी स्वभाव देखणा

नजर करडी शिवभूमीवरी

जणू सह्यरांगेचा अभेद्य कणा

वाटा अनेक सुरेखवळणी

अखंड ह्याचा विस्तार

प्रथमदर्शनी कळसाचा भगवा

फडकता दिसे दिमाखदार

हरिश्चंद्रेश्वर नाव त्याचे

मंदिराचा आवार प्रशस्त

शिवालयाचे राखण्या पावित्र्य

सभोवताली पुत्रगणेशाची गस्त

मध्यवर्ती गडपरिसराचा

शोभे केदारेश्वर मुकुटमणी

ह्या नयनसुखाची कमाल पर्वणी

विष्णुमूर्तीस्थापित सप्ततीर्थ पुष्करणी

वळता पाऊले देखण्यास रूप

रुद्रावतारी कोकणकड्याचे

काळ्या कातळी अवतरले जणू

तृणपुष्पांचे हरित गालिचे

भयाण ह्याची उंची

आणिक अजस्त्र ह्याचे कडे

पूर्वेला रविउदयासमवे

भाग्यवानासी इंद्रवज्र सापडे

येथेच न तू थांबता मावळ्या

वाढवूनी जरा पायांची गती

घे धाव गडशिखराकडे तू

ओळख त्याची तारामती

पोहोचता तेथे वाटे क्षणांत

आभाळ मज पडे तोकडे

साठवूनी मनी क्षितिजांचे रंग

नजरेस सभोवती दिसती सह्यकडे

किती आणखी वर्णू मी तुला

कसे मांडू तुझ्या - माझ्यातले नाते

हरिश्चंद्रा, आता प्रत्येक क्षण

मन तुझ्यापाशीच येऊनी थांबते !!

- जान्हवी फुलवरे.

[ मोरया ट्रेकर्स ]